Кӗркунне сӑнӗсем илӗртеҫ таврара:
Вӑрман ылтӑн тумпа пӗркенет,
Лӑпкӑ-лӑпкӑ садри шӑнкӑр-шӑнкӑр шывра
Кӗленче пек тӳпе чӳхенет.

Астӑватӑп аван: иртнӗ ҫул та ҫапла
Кавир пек ешеретчӗ калча.
Ун чухне эп пӗрремӗш хутчен санпала
Тӗл пулсаттӑм—именчӗк ача.

Сан ҫинчен шӑп ҫулталӑк айван пуҫӑмпа
Шухӑшларӑм эп сӑвӑласа.
Юрату ӑшшипе хӗрнӗ яш чунӑмпа
Эп шанаттӑм эс те савасса...

Кӗркунне кунӗсем илӗртмеҫҫӗ текех,
Курсанах вӗсен капӑр сӑнне,
Эсӗ сулхӑн, сив кӑмӑллӑ пулнӑ пекех,
Тем хӗсет манӑн яш чӗрене.

Ҫавӑн пекех пӑхӑр

Волгин Василий сӑввисем